പ്രതികാരം

പ്രതികാരദാഹിയാം പാവം മനുഷ്യൻ ഞാൻ
പ്രതികരിക്കാനായ് ഇറങ്ങിത്തിരിച്ചിതാ,
പ്രതിയോഗിയായ് കാണ്മതില്ലാരെയും,
നിഴലുകൾ പോലും മറഞ്ഞുനിൽക്കുന്നുവോ.

സ്വപ്നങ്ങൾ മാഞ്ഞു, ചിന്തിച്ചു ഞാൻ,
എന്തിനായീ പ്രതികാരം 
ജനിച്ചുവളർത്തിയ മാതാപിതാവോടോ
സംരക്ഷിക്കുന്ന അമ്മയാം ഭൂമിയോടോ,
സ്നേഹം നൽകി കൊതിപ്പിച്ചവളോടോ
തകർന്നപ്പോൾ ഉയ്ർത്തിയ സൗഹ്രദത്തിനോടോ

ആരോടാണെനിക്കീ പ്രതികാര മോഹങ്ങൾ
ആർക്കെതിരായ് ഇറങ്ങിത്തിരിപ്പൂ ഞാൻ,

ബോധം വന്നൊരാ നിമിഷം ഓർത്തുഞാൻ
എന്നോടാണെനിക്കേറെ പ്രതികാരം
പ്രതികരണമില്ലാ പ്രതിമ പോൽ
പ്രതീക്ഷ നശിച്ച ജീവിതത്തിനോടും,

പ്രതികാരമല്ലിതു ധിക്കാരമത്രെ
തിരിച്ചറിയുന്നു ഞാൻ, തിരിച്ചു പോവുന്നുഞാൻ..


തോമസ്കുട്ടി മാത്യു